معطیِ مطلب تمہارا ہر اِشارہ ہو گیا
جب اِشارہ ہو گیا مطلب ہمارا ہو گیا
ڈوبتوں کا یا نبی کہتے ہی بیڑا پار تھا
غم کنارے ہو گئے پیدا کنارا ہو گیا
تیری طلعت سے زمیں کے ذرّے مہ پارے بنے
تیری ہیبت سے فلک کا مہ دوپارا ہو گیا
اللہ اللہ محو حُسنِ روے جاناں کے نصیب
بند کر لیں جس گھڑی آنکھیں نظارا ہو گیا
یوں تو سب پیدا ہوئے ہیں آپ ہی کے واسطے
قسمت اُس کی ہے جسے کہہ دو ہمارا ہو گیا
تیرگی باطل کی چھائی تھی جہاں تاریک تھا
اُٹھ گیا پردہ ترا حق آشکارا ہو گیا
کیوں نہ دم دیں مرنے والے مرگِ عشقِ پاک پر
جان دی اور زندگانی کا سہارا ہو گیا
نام تیرا، ذکر تیرا، تو، ترا پیارا خیال
ناتوانوں بے سہاروں کا سہارا ہو گیا
ذرّۂ کوے حبیب‘ اللہ رے تیرے نصیب
پاؤں پڑ کر عرش کی آنکھوں کا تارا ہو گیا
تیرے صانع سے کوئی پوچھے ترا حُسن و جمال
خود بنایا اور بنا کر خود ہی پیارا ہو گیا
ہم کمینوں کا اُنھیں آرام تھا اِتنا پسند
غم خوشی سے دُکھ تہِ دل سے گوارا ہو گیا
کیوں نہ ہو تم مالکِ مُلکِ خدا مِلک خدا
سب تمہارا ہے خدا ہی جب تمہارا ہو گیا
روزِ محشر کے اَلم کا دشمنوں کو خوف ہو
دُکھ ہمارا آپ کو کس دن گوارا ہو گیا
جو ازل میں تھی وہی طلعت وہی تنویر ہے
آئینہ سے یہ ہوا جلوہ دوبارا ہو گیا
تو نے ہی تو مصر میں یوسف کو یوسف کر دیا
تو ہی تو یعقوب کی آنکھوں کا تارا ہو گیا
ہم بھکاری کیا ہماری بھیک کس گنتی میں ہے
تیرے دَر سے بادشاہوں کا گزارا ہو گیا
اے حسنؔ قربان جاؤں اُس جمالِ پاک پر
سینکڑوں پردوں میں رہ کر عالم آرا ہو گیا
معطیِ مطلب تمہارا ہر اِشارہ ہو گیا
حالیہ پوسٹیں
- خدا تو نہیں با خدا مانتے ہیں
- عاصیوں کو در تمھارا مل گیا
- ساقیا کیوں آج رِندوں پر ہے تو نا مہرباں
- کیا ہی ذوق افزا شفاعت ہے تمھاری واہ واہ
- میں تو امتی ہوں اے شاہ اُمم
- تُو کجا من کجا
- شورِ مہِ نَو سن کر تجھ تک میں دَواں آیا
- کعبے کی رونق کعبے کا منظر، اللہ اکبر اللہ اکبر
- فلک کے نظارو زمیں کی بہارو سب عیدیں مناؤ حضور آ گئے ہیں
- میری زندگی کا تجھ سے یہ نظام چل رہا ہے
- تم پر میں لاکھ جان سے قربان یا رسول
- گل ا ز رخت آمو ختہ نازک بدنی را بدنی را
- سچ کہواں رب دا جہان بڑا سوھنا اے
- وَرَفَعنا لَکَ ذِکرَک
- خدا کی خلق میں سب انبیا خاص
- صانع نے اِک باغ لگایا
- اشارے سے چاند چیر دیا چھپے ہوئے خور کو پھیر لیا
- کیوں کرہم اہلِ دل نہ ہوں دیوانۂ رسولؐ
- اج سک متراں دی ودھیری اے
- بس! محمد ہے نبی سارے زمانے والا