میرے اتے کرم کما سوھنیا

پنجابی نعت
میرے اتے کرم کما سوھنیا
مینوں وی تے در تے بلا سوھنیا

میرے لیکھاں وچ وی مدینہ لکھدے
تیری گل من دا خدا سوھنیا

تیری اُچی شان نالے سب نالوں وکھری
رب تیری چاہندا اے رضا سوھنیا

میں وی نعت پڑھاں تیرے در تے کھلو کے
پوری کر میری وی دعا سوھنیا

ہجر وچھوڑے مینوں رول سُٹیا
ہور کنی ملنی سزا سوھنیا

بابِ جبرئیل اُتے میں وی رج کے
لواں تیری دید دا مزا سوھنیا

بنا تیرے کون میرے معاف کریگا
لمے چوڑے جرم و خطا سوھنیا

کنی ٹھنڈی مٹھی تے مہک نال پُر
طیبہ وچ وگدی ہوا سوھنیا

جہدی چھانویں بہندے سارے نبی تے ولی
مینوں وی او گنبد وکھا سوھنیا

قدماں چ تیرےمیرے مُکن ایہہ ساہ
ایہو محبوؔب دی دعا سوھنیا