دل میں ہو یاد تری گوشۂ تنہائی ہو
پھر تو خلوت میں عجب انجمن آرائی ہو
آستانے پہ ترے سر ہو اَجل آئی ہو
اَور اے جانِ جہاں تو بھی تماشائی ہو
خاک پامال غریباں کو نہ کیوں زندہ کرے
جس کے دامن کی ہوا بادِ مسیحائی ہو
اُس کی قسمت پہ فدا تخت شہی کی راحت
خاکِ طیبہ پہ جسے چین کی نیند آئی ہو
تاج والوں کی یہ خواہش ہے کہ اُن کے دَر پر
ہم کو حاصل شرفِ ناصیہ فرسائی ہو
اک جھلک دیکھنے کی تاب نہیں عالم کو
وہ اگر جلوہ کریں کون تماشائی ہو
آج جو عیب کسی پر نہیں کھلنے دیتے
کب وہ چاہیں گے مری حشر میں رُسوائی ہو
کیوں کریں بزمِ شبستانِ جناں کی خواہش
جلوۂ یار جو شمع شبِ تنہائی ہو
خلعتِ مغفرت اُس کے لیے رحمت لائے
جس نے خاکِ درِ شہ جاے کفن پائی ہو
یہی منظور تھا قدرت کو کہ سایہ نہ بنے
ایسے یکتا کے لیے ایسی ہی یکتائی ہو
ذکر خدّام نہیں مجھ کو بتا دیں دشمن
کوئی نعمت بھی کسی اور سے گر پائی ہو
جب اُٹھے دستِ اَجل سے مری ہستی کا حجاب
کاش اِس پردہ کے اندر تری زیبائی ہو
دیکھیں جاں بخشیِ لب کو تو کہیں خضر و مسیح
کیوں مرے کوئی اگر ایسی مسیحائی ہو
کبھی ایسا نہ ہوا اُن کے کرم کے صدقے
ہاتھ کے پھیلنے سے پہلے نہ بھیک آئی ہو
بند جب خوابِ اجل سے ہوں حسنؔ کی آنکھیں
اِس کی نظروں میں ترا جلوۂ زیبائی ہو
دل میں ہو یاد تری گوشۂ تنہائی ہو
حالیہ پوسٹیں
- یہ سینہ اور یہ دل دوسرا معلوم ہوتا ہے
- نہ کہیں سے دُور ہیں مَنزلیں نہ کوئی قریب کی بات ہے
- سلام ائے صبحِ کعبہ السلام ائے شامِ بت خانہ
- یا محمد ہے سارا جہاں آپ کا
- کون کہتا ہے کہ زینت خلد کی اچھی نہیں
- اگر چمکا مقدر خاک پاے رہرواں ہو کر
- سن لو خدا کے واسطے اپنے گدا کی عرض
- آمنہ بی بی کے گلشن میں آئی ہے تازہ بہار
- اپنی رحمت کے سمندر میں اُتر جانے دے
- عاصیوں کو دَر تمہارا مل گیا
- یوں تو سارے نبی محترم ہیں سرورِ انبیا تیری کیا بات ہے
- وہی رب ہے جس نے تجھ کو ہمہ تن کرم بنایا
- پیشِ حق مژدہ شفاعت کا سناتے جائیں گے
- جاں بلب ہوں آ مری جاں الغیاث
- وہ نبیوں میں رحمت لقب پانے والا
- جو نور بار ہوا آفتابِ حسنِ ملیح
- چلو دیارِ نبی کی جانب درود لب پر سجا سجا کر
- سر سوئے روضہ جھکا پھر تجھ کو کیا
- ترا ظہور ہوا چشمِ نور کی رونق
- کوئی سلیقہ ہے آرزو کا ، نہ بندگی میری بندگی ہے