تم پر میں لاکھ جان سے قربان یا رسول

تم پر میں لاکھ جان سے قربان یا رسول

بر آئیں میرے دل کے بھِی ارمان یا رسول

کیوں دل سے میں فدا نہ کروں جان یا رسول

رہتے ہیں اس میں آپ کے ارمان یا رسول

کشتہ ہوں روئے پاک کا نکلوں جو قبر سے

جاری میری زباں پہ ہو قرآن یا رسول

دنیا سے اور کچھ نہیں مطلوب ہے مجھے

لے جاوں اپنے ساتھ میں ایمان یا رسول

اس شوق میں کہ آپ کے دامن سے جا ملے

میں چاک کر رہا ہوں گریباں یا رسول

کافی ہے یہ وسیلہ شفاعت کے واسطے

عاصی تو مگر ہوں پشیمان یا رسول

مشکل کشا ہیں آپ امیر آپ کا غلام

اب اس کی مشکلیں بھی ہوں آسان یا رسول